ತಿಂಗಳುಗಳ ಹಿಂದೆ ಟೀಸರ್‌ ಬಿಡುಗಡೆ ಮಾಡಿದ್ದ ‘ಕೆಲವು ದಿನಗಳ ನಂತರ’ ಚಿತ್ರತಂಡ ಈಗ ಟ್ರೈಲರ್‌ನೊಂದಿಗೆ ಮರಳಿದೆ. ಚಿತ್ರದಲ್ಲೊಂದು ಸಂದೇಶವಿದೆ ಎನ್ನುವ ನಿರ್ದೇಶಕ ಶ್ರೀನಿ, ಆಡಿಯೋ ಬಿಡುಗಡೆಯಲ್ಲೂ ವೈಶಿಷ್ಠ್ಯ ಮೆರೆದಿದ್ದಾರೆ. ಆಡಿಯೋ ಬಿಡುಗಡೆ ಸಮಾರಂಭದಲ್ಲಿ ಚಿತ್ರತಂಡದ ನೂರು ಜನರು ನೇತ್ರದಾನ ಮಾಡಿದ್ದಾರೆ. ಇನ್ನು, ಹೊಸದಾಗಿ ಬಿಡುಗಡೆ ಮಾಡಿರುವ ಟ್ರೈಲರ್‌ನಲ್ಲಿ ಸಿನಿಮಾದ ಮತ್ತಷ್ಟು ವಿಶೇಷಗಳು ರಿವೀಲ್ ಅಗಿದೆ. "ಹಾಲಿವುಡ್‌ನಲ್ಲಿ ಝಾಂಬಿ ಹಾರರ್‌ ಸಿನಿಮಾಗಳು ಬಹುಜನಪ್ರಿಯ. ಮೊದಲ ಬಾರಿಗೆ ಸ್ಯಾಂಡಲ್‌ವುಡ್‌ನಲ್ಲಿ ನಮ್ಮ ಚಿತ್ರದ ಮೂಲಕ ಝಾಂಬಿ ಪಾತ್ರ ತಂದಿದ್ದೇವೆ," ಎನ್ನುತ್ತಾರವರು. “ಜಾಗತಿಕರಣದ ದಿನಗಳಲ್ಲಿ ಮಾನವೀಯ ಸಂಬಂಧಗಳು ತೆಳುವಾಗುತ್ತಿರುವ ಸಂದರ್ಭದಲ್ಲಿ ನಮ್ಮ ಚಿತ್ರವ ಕಥಾವಸ್ತು ಪ್ರಸ್ತುತವೆನಿಸುತ್ತದೆ. ನಮಗೇ ಅರಿವಿಲ್ಲದಂತೆ ಮಾಡುವ ತಪ್ಪುಗಳು ಎಂತಹ ಅನಾಹುತ ಸೃಷ್ಟಿಸುತ್ತವೆ ಎನ್ನುವುದನ್ನು ಇಲ್ಲಿ ಹೇಳುತ್ತಿದ್ದೇವೆ,” ಎನ್ನುತ್ತಾರೆ ಶ್ರೀನಿ. ಚಿತ್ರದ ಕಥಾವಸ್ತವನ್ನು ಸ್ಥೂಲವಾಗಿ ಪರಿಚಯಿಸುವ ಅವರು ನಿರ್ದಿಷ್ಟವಾಗಿ ‘ಮನುಷ್ಯರು ಮಾಡುವ ಆ ತಪ್ಪುಗಳೇನು?’ ಎನ್ನುವ ಗುಟ್ಟನ್ನು ಬಿಟ್ಟುಕೊಡುವುದಿಲ್ಲ.
ಚಿತ್ರದಲ್ಲಿ ಆರು ತಿಂಗಳ 3ಡಿ ಗ್ರಾಫಿಕ್ಸ್ ಮಗುವೊಂದನ್ನು ಸೃಷ್ಟಿಸಿರುವುದಾಗಿ ಶ್ರೀನಿ ಹೇಳಿದ್ದರು. ಟ್ರೈಲರ್‌ನಲ್ಲಿ ಅದು ಗೋಚರವಾಗುತ್ತದೆ. “ಚಿತ್ರದ ವಿಶೇಷ ಪಾತ್ರ ಈ ತ್ರೀಡಿ ಮಗು. ಗ್ರಾಫಿಕ್‌ ಸೃಷ್ಟಿಗೂ ಕಾರಣವಿದೆ. ಚಿತ್ರಕತೆ ಹೇಗಿದೆ ಅಂದರೆ, ಅರು ತಿಂಗಳ ಮಗು ವಯಸ್ಸಿಗೆ ಮೀರಿದ ಭಾವನೆಗಳನ್ನು ವ್ಯಕ್ತಪಡಿಸಬೇಕಿದೆ. ಹಾಗಾಗಿ ಸಹಜವಾಗಿ ಕಾಣಿಸುವಂತೆ ತ್ರೀಡಿ ಮಗು ಸೃಷ್ಟಿಸಿದ್ದೇವೆ. ಇಂತಹ ಹಲವು ಅಚ್ಚರಿಗಳು ಚಿತ್ರದಲ್ಲಿವೆ,” ಎನ್ನುತ್ತಾರವರು. ನಟಿ ಶುಭಾ ಪೂಂಜಾ ಚಿತ್ರದಲ್ಲಿ ಸಾಫ್ಟ್‌ವೇರ್‌ ಇಂಜಿನಿಯರ್ ಪಾತ್ರ ನಿರ್ವಹಿಸುತ್ತಿದ್ದಾರೆ. “ಚಿತ್ರದ ಪ್ರಚಾರಕ್ಕಾಗಿ ಆಡಿಯೋ ಬಿಡುಗಡೆಯಂದು ನೇತ್ರದಾನ ಹಮ್ಮಿಕೊಂಡಿಲ್ಲ. ಚಿತ್ರದಲ್ಲೂ ಒಂದೊಳ್ಳೆಯ ಸಂದೇಶ ಹೇಳುತ್ತಿದ್ದು, ಸಾಂಕೇತಿಕವಾಗಿ ನೇತ್ರದಾನದಂತಹ ಒಳ್ಳೆಯ ಕೆಲಸದ ಬಗ್ಗೆ ನಿರ್ದೇಶಕರು ಆಲೋಚಿಸಿದ್ದಾರೆ,” ಎನ್ನುತ್ತಾರೆ ಶುಭಾ. ‘ಕಾಮಿಡಿ ಕಿಲಾಡಿಗಳು’ ಖ್ಯಾತಿಯ ಲೋಕೇಶ್‌, ಶೋ ನಿರ್ದೇಶಕ ಶರಣಯ್ಯ, ‘ಮಜಾ ಟಾಕೀಸ್‌’ ಖ್ಯಾತಿಯ ಪವನ್‌ ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿದ್ದಾರೆ. ‘ಹೋಮ್‌ಸ್ಟೇ’, ‘ರಿಕ್ತ’ ಚಿತ್ರಗಳಿಗೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದ ಶ್ರೀನಿ ಅವರ ಚೊಚ್ಚಲ ನಿರ್ದೇಶನದ ಚಿತ್ರವಿದು. ಮುರಳೀಧರ್ ಮತ್ತು ನವೀನ್ ಛಾಯಾಗ್ರಹಣ ಮಾಡಿದ್ದು, ಬಕ್ಕೇಶ್ ಮತ್ತು ವಿಜಯ್‌ ಸಂಗೀತ ಸಂಯೋಜಿಸಿದ್ದಾರೆ.
‘ಕೆಲವು ದಿನಗಳ ನಂತರ’ ಚಿತ್ರದ ಹಾಡುಗಳು
