ಫಿಫಾ ವಿಶೇಷ | ದಿಗ್ಗಜರ ಕಾದಾಟಕ್ಕೆ ಸಾಕ್ಷಿಯಾಗಲಿವೆ ಈ ಬೆರಗಿನ ಕ್ರೀಡಾಂಗಣಗಳು

ರಷ್ಯಾದಲ್ಲಿ ನಡೆಯುತ್ತಿರುವ ಫಿಫಾ ವಿಶ್ವಕಪ್ ಪಂದ್ಯಾವಳಿಯಲ್ಲಿ ಒಟ್ಟು ೬೪ ಪಂದ್ಯಗಳಿಗೆ ಹನ್ನೆರಡು ಕ್ರೀಡಾಂಗಣಗಳು ಸಜ್ಜಾಗಿವೆ. 11 ನಗರಗಳಲ್ಲಿನ ಈ ತಾಣಗಳನ್ನು ಸುಸಜ್ಜಿತಗೊಳಿಸಲಾಗಿದೆ. ೮೧ ಸಾವಿರಕ್ಕೂ ಹೆಚ್ಚಿನ ಪ್ರೇಕ್ಷಕ ಸಾಮರ್ಥ್ಯ ಹೊಂದಿರುವ ಲುಜ್ನಿಕಿ ಕ್ರೀಡಾಂಗಣವೇ ಬೃಹತ್ ತಾಣವೆನಿಸಿದೆ

ಲುಜ್ನಿಕಿ ಕ್ರೀಡಾಂಗಣ

ರಷ್ಯಾ ದೇಶದ ಪಶ್ಚಿಮ ಭಾಗದಲ್ಲಿನ ಮೊಸ್ಕ್ವಾ ನದಿ ತಟದಲ್ಲಿನ ಈ ಕ್ರೀಡಾಂಗಣವನ್ನು ರಷ್ಯಾ ರಾಜಧಾನಿ ಮಾಸ್ಕೋದಲ್ಲಿ ನಿರ್ಮಿಸಲಾಗಿದೆ. ಜುಲೈ ೧೫ರಂದು ನಡೆಯಲಿರುವ ಫೈನಲ್ ಒಳಗೊಂಡಂತೆ ಏಳು ಮಹತ್ವಪೂರ್ಣ ಪಂದ್ಯಗಳಿಗೆ ಈ ತಾಣ ಆತಿಥ್ಯ ಹೊತ್ತಿದೆ. ೮೧,೦೦೧ ಸಾವಿರ ಪ್ರೇಕ್ಷಕ ಸಾಮರ್ಥ್ಯದ ಈ ಕ್ರೀಡಾಂಗಣಕ್ಕೆ ಸೆಂಟ್ರಲ್ ಲೆನಿನ್ ಕ್ರೀಡಾಂಗಣ ಎಂತಲೂ ಕರೆಯಲಾಗುತ್ತಿದ್ದು, ೧೯೫೬ರಲ್ಲಿ ಇದನ್ನು ನಿರ್ಮಿಸಲಾಯಿತು.

ಸೇಂಟ್ ಪೀಟರ್ಸ್‌ಬರ್ಗ್ ಕ್ರೀಡಾಂಗಣ

ಜೆನಿತ್ ಅರೇನಾ, ಕ್ರೆಸ್ಟೋವ್ಸ್ಕಿ ಹಾಗೂ ಪೀಟರ್ ಅರೇನಾ ಎಂತಲೂ ಕರೆಯಲಾಗುವ ಈ ಕ್ರೀಡಾಂಗಣ ರಷ್ಯಾದ ಉತ್ತರ ಭಾಗದಲ್ಲಿರುವ ಗಲ್ಫ್ ಆಫ್ ಫಿನ್ಲ್ಯಾಂಡ್‌ನಲ್ಲಿದೆ. ಈ ೨೦೧೭ರಲ್ಲಿ ಪುನರ್‌ನವೀಕರಿಸಲಾಗಿರುವ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯ ೬೮,೧೩೧. ನೇವಾ ನದಿಯ ದಡದಲ್ಲಿ ನಿರ್ಮಿಸಲಾಗಿರುವ ಈ ಕ್ರೀಡಾಂಗಣವು ೨೦೧೭ರಿಂದ ಕಾರ್ಯಾಚರಿಸುತ್ತಿದೆ. ಈ ಬಾರಿಯ ವಿಶ್ವಕಪ್‌ ಪಂದ್ಯಾವಳಿಯ ಒಂದು ಸೆಮಿಫೈನಲ್ ಪಂದ್ಯ ಇದೇ ಮೈದಾನದಲ್ಲಿ ಜರುಗಲಿದೆ.

ಫಿಶ್ತ್ ಕ್ರೀಡಾಂಗಣ

ದಕ್ಷಿಣ ಭಾಗದಲ್ಲಿರುವ ಸೋಚಿ ನಗರದಲ್ಲಿ ಫಿಶ್ತ್ ಕ್ರೀಡಾಂಗಣ ತಲೆ ಎತ್ತಿದೆ. ಕೌಕಾಸಸ್ ಪರ್ವತ ಶ್ರೇಣಿಗಳಿಂದ ಆವೃತವಾಗಿರುವ ಬ್ಲ್ಯಾಕ್ ಸಮುದ್ರದ ದಡದಲ್ಲಿ ಈ ಕ್ರೀಡಾಂಗಣವನ್ನು ನಿರ್ಮಿಸಲಾಗಿದೆ. ೨೦೧೩ರಲ್ಲಿ ಆರಂಭವಾದ ಈ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯವನ್ನು ಎರಡು ವರ್ಷಗಳ ಹಿಂದಷ್ಟೇ ೪೭,೭೦೦ಕ್ಕೆ ಹೆಚ್ಚಿಸಲಾಗಿದೆ. ಕ್ವಾರ್ಟರ್‌ಫೈನಲ್ ಪಂದ್ಯವನ್ನೂ ಒಳಗೊಂಡಂತೆ ಈ ಕ್ರೀಡಾಂಗಣದಲ್ಲಿ ಒಟ್ಟು ಆರು ಪಂದ್ಯಗಳು ಜರುಗಲಿವೆ.

ಸ್ಪಾರ್ಟಕ್ ಕ್ರೀಡಾಂಗಣ

ಮಾಸ್ಕೋ ನಗರದ ವಾಯುವ್ಯ ಭಾಗದಲ್ಲಿರುವ ಈ ಕ್ರೀಡಾಂಗಣ ತನ್ನದೇ ಆದ ಇತಿಹಾಸವನ್ನು ಹೊಂದಿದೆ. ರೋಮನ್ ಸಾಮ್ರಾಜ್ಯದ ಬಂಡಾಯಗಾರ ಸ್ಪಾರ್ಟಕಸ್ ಸ್ಮರಣಾರ್ಥ ಈ ಕ್ರೀಡಾಂಗಣಕ್ಕೆ ಸ್ಪಾರ್ಟಕ್ ಎಂದೇ ಕರೆಯಲಾಗಿದೆ. ಹದಿನೆಂಟು ವರ್ಷಗಳ ಹಿಂದೆಯೇ ಪೂರ್ಣವಾಗಬೇಕಿದ್ದ ಕ್ರೀಡಾಂಗಣವು ಕೆಲವೊಂದು ಕಾರಣಗಳಿಂದಾಗಿ ೨೦೧೪ರಲ್ಲಿ ಆಟಕ್ಕೆ ಸಜ್ಜಾಯಿತು. ೪೩,೨೯೮ ಪ್ರೇಕ್ಷಕ ಸಾಮರ್ಥ್ಯವಿರುವ ಈ ಕ್ರೀಡಾಂಗಣದಲ್ಲಿ ಒಟ್ಟು ಐದು ಪಂದ್ಯಗಳು ಜರುಗಲಿವೆ.

ಕಜಾನ್ ಅರೆನಾ

ಮಾಸ್ಕೋ ನಗರದ ಪೂರ್ವಭಾಗದಲ್ಲಿರುವ ತತರ್‌ಸ್ಥಾನ್ ಗಣರಾಜ್ಯದಲ್ಲಿದೆ. ವೋಲ್ಗಾ ಮತ್ತು ಕಜಂಕಾ ನದಿಗಳ ಸಂಗಮದ ದಡದಲ್ಲಿ ಈ ಕ್ರೀಡಾಂಗಣವನ್ನು ನಿರ್ಮಿಸಲಾಗಿದೆ. ಇದು ಕೂಡ ೨೦೧೩ರಲ್ಲಿ ಆರಂಭವಾಗಿದ್ದು, ಈ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯ ೪೪,೭೭೯. ಈ ಕ್ರೀಡಾಂಗಣವು ಒಂದು ಕ್ವಾರ್ಟರ್‌ಫೈನಲ್ ಸೇರಿದಂತೆ ಒಟ್ಟು ೬ ಪಂದ್ಯಗಳಿಗೆ ಆತಿಥ್ಯ ಹೊತ್ತಿದೆ.

ಸಮರಾ ಅರೆನಾ

ರಷ್ಯಾದ ಆಗ್ನೇಯ ದಿಕ್ಕಿನಲ್ಲಿದೆ. ವೋಲ್ಗಾ ನದಿಯ  ಪೂರ್ವದಿಕ್ಕಿನಲ್ಲಿ ತಲೆಎತ್ತಿರುವ ಸಮರಾ ಅರೇನಾ ಕ್ರೀಡಾಂಗಣವು ಗುಮ್ಮಟಾಕಾರದಲ್ಲಿರುವುದು ವಿಶೇಷ. ಇದೇ ವರ್ಷ ಪೂರ್ಣಗೊಂಡಿರುವ ಈ ಕ್ರೀಡಾಂಗಣದ ಸಾಮರ್ಥ್ಯವು ೪೪,೮೦೭ರಷ್ಟಿದೆ. ಇನ್ನು, ಈ ಮೈದಾನ ಕೂಡ ಒಂದು ಕ್ವಾರ್ಟರ್‌ಫೈನಲ್ ಪಂದ್ಯವನ್ನು ಒಳಗೊಂಡಂತೆ ಒಟ್ಟು ೬ ಪಂದ್ಯಗಳಿಗೆ ಆತಿಥ್ಯ ಹೊತ್ತಿದೆ.

ವೋಲ್ಗಾಗ್ರ್ಯಾದ್ ಅರೆನಾ

ನೈರುತ್ಯ ದಿಕ್ಕಿನಲ್ಲಿನ ಹಳೆಯ ಕ್ರೀಡಾಂಗಣವನ್ನು ಕೆಡವಿ ಆ ಜಾಗದಲ್ಲಿ ಈ ಕ್ರೀಡಾಂಗಣವನ್ನು ನಿರ್ಮಿಸಲಾಗಿದೆ. ವೋಲ್ಗಾ ನದಿಯ ಪಶ್ಚಿಮ ದಿಕ್ಕಿನಲ್ಲಿರುವ ದಡದಲ್ಲಿ ಮೈದಳೆದಿರುವ ಇದನ್ನು ಸ್ಟ್ಯಾಲಿನ್‌ಗ್ರ್ಯಾದ್ ಎಂದೂ ಕರೆಯಲಾಗುತ್ತಿತ್ತು. ಈ ನಗರದಲ್ಲಿನ ಈ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯವು ೪೫,೫೬೮ರಷ್ಟಿದ್ದು, ಇದೂ ಕೂಡಾ ೨೦೧೮ರಲ್ಲಿ ಆಟಕ್ಕೆ ತೆರೆದುಕೊಂಡಿರುವ ಈ ಕ್ರೀಡಾಂಗಣದಲ್ಲಿ ಆರಂಭಿಕ ಹಂತದ ನಾಲ್ಕು ಪಂದ್ಯಗಳು ನಡೆಯಲಿವೆ.

ರೊಸ್ತೊವ್ ಅರೆನಾ

ಮಾಸ್ಕೋ ನಗರದ ದಕ್ಷಿಣ ಭಾಗದಲ್ಲಿರುವ ರೊಸ್ತೊವ್ ಅರೆನಾ ಕ್ರೀಡಾಂಗಣವು ಅಜೊವ್ ಸಮುದ್ರದಿಂದ ೨೦ ಮೈಲು ದೂರದಲ್ಲಿದೆ. ಡಾನ್ ನದಿಯ ದಂಡೆಯ ಮೇಲೆ ಇದನ್ನು ನಿರ್ಮಿಸಲಾಗಿದೆ. ೨೦೧೮ರಲ್ಲಿ ಆರಂಭವಾಗಿರುವ ಈ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯವು ೪೫,೧೪೫. ಈ ಕ್ರೀಡಾಂಗಣದಲ್ಲಿ ಒಟ್ಟು ಐದು ಪಂದ್ಯಗಳು ನಡೆಯಲಿವೆ.

ನಿಜ್ನಿ ನೊವ್‌ಗೊರೋದ್ ಕ್ರೀಡಾಂಗಣ

ಮಾಸ್ಕೋ ನಗರದ ಪೂರ್ವ ದಿಕ್ಕಿನಲ್ಲಿರುವ ನಿಜ್ನಿ ನೊಮ್ ಗೊರೋದ್ ಕ್ರೀಡಾಂಗಣದ ಕಾಮಗಾರಿ ೨೦೧೮ರಲ್ಲಿ ಪೂರ್ಣಗೊಂಡಿತು. ನಿಜೆಗೊರೊದ್ ಒಬ್ಲ್ಯಾಸ್ಟ್ ನಗರದಲ್ಲಿರುವ ಈ ಕ್ರೀಡಾಂಗಣವು ವೋಲ್ಗಾ ಮತ್ತು ಓಕಾ ನದಿಗಳು ಸಂಗಮವಾಗುವ ಸ್ಥಳದಲ್ಲಿ ನಿರ್ಮಿತಿಯಾಗಿದೆ. ಈ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯವು ೪೫,೩೩೧ರಷ್ಟಿದ್ದು, ಇಲ್ಲಿ ಒಂದು ಕ್ವಾರ್ಟರ್‌ಫೈನಲ್ ಸೇರಿ ಆರು ಪಂದ್ಯಗಳು ಜರುಗಲಿವೆ.

ಎಕಾತೆರಿನ್‌ಬರ್ಗ್ ಅರೆನಾ

ಉರಲ್ ಪರ್ವತಶ್ರೇಣಿಗಳಿಂದ ಸುತ್ತುವರೆದಿರುವ, ರಷ್ಯಾದ ನಾಲ್ಕನೇ ಬಹುದೊಡ್ಡ ನಗರ ಎಕಾತೆರಿನ್‌ಬರ್ಗ್. ಈ ಪ್ರದೇಶದಲ್ಲಿ ನಿರ್ಮಿಸಲಾಗಿರುವ ಈ ಕ್ರೀಡಾಂಗಣವು ೧೯೫೭ರಲ್ಲೇ ನಿರ್ಮಾಣಗೊಂಡಿದೆ. ಸೆಂಟ್ರಲ್ ಸ್ಟೇಡಿಯಂ ಎಂದೂ ಕರೆಯಲಾಗುವ ಇಲ್ಲಿ ನಾಲ್ಕು ಪಂದ್ಯಗಳು ನಡೆಯಲಿವೆ. ೨೦೧೮ರ ಫಿಫಾ ವಿಶ್ವಕಪ್‌ ಆತಿಥ್ಯವು ದೊರೆತ ನಂತರದಲ್ಲಿ ಈ ಕ್ರೀಡಾಂಗಣವನ್ನು ಉನ್ನತೀಕರಿಸಲಾಯಿತು. ಒಟ್ಟಾರೆ ಪ್ರೇಕ್ಷಕ ಸಾಮರ್ಥ್ಯವು ೩೫,೬೯೬.

ಇದನ್ನೂ ಓದಿ : ಫಿಫಾ ೨೦೧೮ | ರೋಮಾಂಚನ ಹುಟ್ಟಿಸಿದ ಸಾರ್ವಕಾಲಿಕ ಹತ್ತು ಗೋಲ್‌ಗಳು

ಮೊರ್ದೆವಿಯಾ ಅರೆನಾ

ಮಾಸ್ಕೋದ ಆಗ್ನೇಯ ದಿಕ್ಕಿನಲ್ಲಿರುವ ಸರಾನ್ಸ್ಕ್ ನಗರದಲ್ಲಿ ಈ ಮೊರ್ದೆವಿಯಾ ಅರೆನಾ ಕ್ರೀಡಾಂಗಣವನ್ನು ನಿರ್ಮಿಸಲಾಗಿದೆ. ನಾಲ್ಕು ಪಂದ್ಯಗಳಿಗೆ ಈ ಅಂಗಣ ಆತಿಥ್ಯ ಹೊತ್ತಿದೆ. ಅಂದಹಾಗೆ, ಈ ನಗರ ಮೊರ್ದೆವಿಯಾ ಗಣರಾಜ್ಯದ ರಾಜಧಾನಿ ಕೂಡಾ. ಇದೇ ವರ್ಷ ಆರಂಭವಾಗಿರುವ ಈ ಕ್ರೀಡಾಂಗಣದ ಒಟ್ಟಾರೆ ಪ್ರೇಕ್ಷಕ ಸಾಮರ್ಥ್ಯ ೪೪,೪೪೨.

ಕಲಿನಿಂಗ್ರಾದ್ ಕ್ರೀಡಾಂಗಣ

ಇಪ್ಪತ್ತೊಂದನೇ ವಿಶ್ವಕಪ್ ಪಂದ್ಯಾವಳಿಗೆ ಸಜ್ಜುಗೊಳಿಸಲಾಗಿರುವ ಹನ್ನೆರಡನೇ ಹಾಗೂ ಕೊನೆಯ ಕ್ರೀಡಾಂಗಣವಿದು. ಅರೆನಾ ಬಾಲ್ಟಿಕಾ ಎಂದು ಕೂಡ ಈ ತಾಣವನ್ನು ಕರೆಯಲಾಗುತ್ತದೆ. ಪೋಲೆಂಡ್ ಮತ್ತು ಲಿಥುವೇನಿಯಾ ರಾಷ್ಟ್ರಗಳ ಗಡಿ ಭಾಗದಲ್ಲಿರುವ ಕಲಿನಿನ್‌ಗ್ರ್ಯಾದ್ ಒಬ್ಲ್ಯಾಸ್ಟ್ ನಗರದಲ್ಲಿದೆ. ಮೂರು ವರ್ಷಗಳ ಕಾಮಗಾರಿ ೨೦೧೮ರಲ್ಲಿ ಮುಕ್ತಾಯ ಕಂಡಿದ್ದು, ಇಲ್ಲಿ ನಾಲ್ಕು ಪಂದ್ಯಗಳು ನಡೆಯಲಿವೆ. ಈ ಕ್ರೀಡಾಂಗಣದ ಪ್ರೇಕ್ಷಕ ಸಾಮರ್ಥ್ಯವು ೩೫,೨೧. ಅಂದಹಾಗೆ, ಎರಡನೇ ವಿಶ್ವ ಸಮರದವರೆಗೂ ಈ ನಗರವು ಜರ್ಮನ್‌ನ ಭೂಭಾಗವಾಗಿತ್ತು.

ತಿರುವನಂತಪುರದಲ್ಲಿ ಸರಣಿ ಕೈವಶಕ್ಕೆ ಸಜ್ಜಾದ ಭಾರತ, ಎಲ್ಲರ ಗಮನ ಧೋನಿಯತ್ತ
ಗಂಡು ಮಗುವಿನ ಸಂಭ್ರಮದಲ್ಲಿ ಸಾನಿಯಾ ಮಿರ್ಜಾ ಹಾಗೂ ಶೋಯೆಬ್ ದಂಪತಿ
ಕೊಹ್ಲಿ ಕಟ್ಟಿಹಾಕಿದ ಕೆರಿಬಿಯನ್ನರನ್ನು ಕಾಡಿದ ರೋಹಿತ್-ಅಂಬಟಿ ಬೊಂಬಾಟ್ ಶತಕ
Editor’s Pick More